ជីវិតតស៊ូរបស់លោក ឈៀង កាយជៀក អ្នកបង្កើតរដ្ឋនៅកោះតៃវ៉ាន់
ឈៀង កាយជៀក គឺជាមេដឹកនាំចិនដ៏សំខាន់ម្នាក់ក្នុងចំណោមមេដឹកនាំសំខាន់ៗរបស់ចិនដទៃទៀតក្នុងស.វ ទី ២០។ លោក បានដើរតួយ៉ាងសំខាន់ក្នុងគណបក្សជាតិនិយមរបស់ចិន ក្រោយពីមរណភាពរបស់ ស៊ុន យ៉ាតសេន ជាពិសេសនោះគឺការព្យាយាមបញ្ចប់សង្គ្រាមស៊ីវិលក្នុងប្រទេសចិន។ នៅឆ្នាំ ១៩៥០ លោក ក៏បានក្លាយជាប្រជាធិបតីរបស់កោះតៃវ៉ាន់ ក្រោយពេលចាញ់សង្គ្រាមជាមួយនឹងពួកកុម្មុយនីស្តរបស់ម៉ៅ សេទុង។
ចាប់កំណើតក្នុងគ្រួសារស្តុកស្តម្ភ
ឈៀង កាយជៀក (Chiang Kai-Shek) មានដើមកំណើតនៅភាគខាងកើតប្រទេសចិន ដោយកើតនៅថ្ងៃទី ៣០ ខែតុលា ឆ្នាំ ១៨៨៧ ក្នុងគ្រួសារអ្នកជំនួញមានទ្រព្យសម្បត្តិច្រើន។ ឪពុករបស់លោក គឺជាអ្នកក្ដោបក្ដាប់ទំនិញស្រា និង អំបិលក្នុងតំបន់ដែលរស់នៅ។
ដូច្នេះបញ្ហាជីវភាពគ្រួសារមិនមែនជា បញ្ហាសម្រាប់ ឈៀង កាយជៀក នោះទេ។ តាំងពីក្មេងមក លោកបានចូលសិក្សានៅក្នុងសាលាដោយមិនខុសពីក្មេងៗជនជាតិចិនដទៃទៀតនោះទេ ដែលត្រូវសិក្សាសំខាន់ទៅលើទស្សនរបស់ខុងជឺយ៉ាងជាប់លាប់។ ប៉ុន្តែនៅអាយុ៩ ឆ្នាំឪពុក និង លោកតារបស់គាត់បានស្លាប់ ដូច្នេះជីវិតរបស់លោក បានរស់នៅជាមួយនឹងម្តាយរហូតមក ហើយលោក មានការគោរពយ៉ាងខ្លាំងចំពោះម្តាយរបស់ខ្លួន។
ចាប់អារម្មណ៍ខ្លាំងលើផ្នែកយោធា និងនយោបាយ ខណៈស្រុកទេសកំពុងចលាចល
កាលជំនាន់នោះ ប្រទេសចិនពោរពេញទៅដោយភ្លើងសង្គ្រាមដែលមានការកាប់សម្លាប់គ្នាសឹងគ្រប់ទីកន្លែង ដូច្នេះ ឈៀង កាយជៀក ក៏បានចាប់អារម្មណ៍ យ៉ាងខ្លាំងទៅលើផ្នែកយោធា និង នយោបាយ។ នៅអាយុ១៨ ឆ្នាំ គាត់ក៏បានសម្រេចចិត្តចូលសិក្សានៅសាលាយោធា។
ក្រោយមកទៀត ក៏បានទៅបន្តការសិក្សាផ្នែកយោធានេះនៅក្នុងទីក្រុងតូក្យូប្រទេសជប៉ុន។នៅប្រទេសជប៉ុននោះ លោកក៏បានចូលរួមសកម្មភាពនយោបាយក្នុងប្រទេសចិនយ៉ាងសកម្មផងដែរ ជាពិសេសចូលរួមជាមួយនឹងចលនារបស់ អ្នកបដិវត្តដ៏ល្បីល្បាញរបស់ចិន គឺលោក ស៊ុនយ៉ាតសេន។ នៅឆ្នាំ ១៩២៣ លោក ក៏បានទៅសិក្សានៅប្រទេសរុស្ស៊ី ផ្នែកយោធានេះផងដែរ។
ចូលប្រឡូកក្នុងវិស័យនយោបាយ
ក្រោយពីត្រឡប់មកដល់ប្រទេសចិនវិញ លោកបានឈានជើងកាន់តែជ្រៅទៅក្នុងកិច្ចការនយោបាយ ជាមួយនឹងគណបក្សជាតិនិយមរបស់ ស៊ុន យ៉ាតសេន ដើម្បីប្រឆាំងទៅនឹងរបបរាជវង្ស។នៅក្នុងសកម្មភាពនយោបាយរបស់ ឈៀង កាយជៀក (Chiang Kai-Shek) ក្នុងប្រទេសចិននោះលោក មានភាពស្និទ្ធស្នាលយ៉ាងខ្លាំងជាមួយនឹងស៊ុន យ៉ាតសេន ។
ក្រោយពេលដែល ស៊ុន យ៉ាតសេន បានស្លាប់នៅក្នុងឆ្នាំ ១៩២៥ ឈៀង កាយជៀក (Chiang Kai-Shek) បានទទួលមុខដំណែងកាន់តែធំនៅក្នុងបក្ស ពោលគឺទទួលបន្ទុកគ្រប់គ្រងចលនាបដិវត្តន៍នៅភាគខាងត្បូងនៃប្រទេស ហើយនៅឆ្នាំ ១៩២៦ លោក បានទទួលជោគជ័យក្នុងការបង្រួបបង្រួមជម្លោះរបស់ចិន ។ ប៉ុន្តែយ៉ាងណាក៏ដោយគឺក្រោយពេល ឈៀង កាយជៀក (Chiang Kai-Shek) ក្ដោបក្ដាប់អំណាចនោះ ចិនស្ថិតនៅក្នុងសន្តិភាពរយៈពេលខ្លីតែប៉ុណ្ណោះ ដោយសារតែបញ្ហាឈ្លានពានពីសំណាក់បរទេស។
ចាប់ពីឆ្នាំ ១៩៣១ មក ឈៀង កាយជៀក (Chiang Kai-Shek) បានយកចិត្តទុកដាក់យ៉ាងខ្លាំងទៅលើការឈ្លានពានរបស់កង កម្លាំងរដ្ឋាភិបាលជប៉ុនមកលើទឹកដីចិន។ ហើយនៅឆ្នាំ ១៩៣៧ ជប៉ុនបានចូលឈ្លានពានទឹកដីចិនជាលក្ខណៈទ្រង់ទ្រាយធំ ក្រោយមកពោលគឺនៅឆ្នាំ ១៩៤១ ខាងអាមេរិកក៏បានចេញមុខប្រឆាំងជាមួយនឹងជប៉ុនផងដែរ ដូច្នេះលោក ឈៀង កាយជៀក (Chiang Kai-Shek) ក៏បានក្លាយទៅជាសម្ព័ន្ធមិត្តជាមួយនឹងអាមេរិកដើម្បីទប់ស្កាត់ឥទ្ធិពលរបស់ជប៉ុន។
ចាញ់ក្រុមកុម្មុយនីស្តដឹកនាំដោយ ម៉ៅ សេទុង ហើយភៀសខ្លួនទៅកោះតៃវ៉ាន់៖ ប៉ុន្តែយ៉ាងណាក៏ដោយ នៅឆ្នាំ ១៩៤៦ ចិនក៏ប្រឈមជាមួយនឹងបញ្ហាសង្គ្រាមស៊ីវិលដ៏ធ្ងន់ធ្ងរទៀត ពោលគឺ គណបក្សជាតិនិយមដែលដឹកនាំដោយឈៀង កាយជៀក (Chiang Kai-Shek) មានជម្លោះជាមួយនឹងកុម្មុយនីស្តចិនក៏បានធ្វើការប្រយុទ្ធគ្នាយ៉ាងខ្លាំង។ នៅទីបំផុតជ័យជំនះក៏បានធ្លាក់ទៅលើពួក កុម្មុយនីស្តដែលដឹកនាំដោយ ម៉ៅ សេទុងកាលពីជំនាន់នោះ។ ក្រោយពេលដែលប្រយុទ្ធចាញ់ពួកកុម្មុយនីស្តរបស់ម៉ៅ សេទុងហើយនោះ លោក ឈៀង កាយជៀក (Chiang Kai-Shek) រួមជាមួយនឹងសមាជិកបក្សជាច្រើនទៀតក៏បានរត់ភៀសខ្លួន ទៅកាន់កោះតៃវ៉ាន់។
ធ្វើឲ្យកោះតៃវ៉ាន់ស្គាល់ការរីកចម្រើនខ្លាំង
នៅពេលទៅដល់ទីនោះ ឈៀង កាយជៀក (Chiang Kai-Shek) ក៏ត្រូវបានគេបោះឆ្នោតឲ្យក្លាយជាប្រធានាធិបតីរបស់តៃវ៉ាន់នៅឆ្នាំ ១៩៥០។ ជាការកត់សម្គាល់ បើទោះបីជាត្រូវបានរត់ភៀសខ្លួនមកតាំងរដ្ឋាភិបាលថ្មីនៅលើកោះតៃវ៉ាន់ក្តី តែការដឹកនាំរបស់គណបក្សជាតិនិយមនេះ បាននាំឲ្យសេដ្ឋកិច្ចតៃវ៉ាន់ស្គាល់ការរីកចម្រើនឆាប់រហ័ស ពោលគឺលឿនជាងចិនដីគោកដែលគ្រប់គ្រងដោយបក្សកុម្មុយនីស្តនោះ។ ហើយកាលនោះ តៃវ៉ាន់មានឈ្មោះក្នុងនាមជាចិនទាំងមូល ដោយនៅតែអាចរក្សាកៅអីក្នុងនាមជា សមាជិករបស់អង្គការសហប្រជាជាតិដដែល។
អង្គការសហប្រជាជាតិដកហូតកៅអីរបស់តៃវ៉ាន់
ប៉ុន្តែនៅឆ្នាំ១៩៧១ អង្គការសហប្រជាជាតិក៏បានដកហូតកៅអីរបស់តៃវ៉ាន់ ដែលតំណាងឲ្យចិនទាំងមូលនោះ ប្រគល់ទៅហើយចិនដីគោកដែលដឹកនាំដោយពួកកុម្មុយនីស្តទៅវិញ។ បញ្ហានេះក៏បានធ្វើឲ្យ ឈៀង កាយជៀក (Chiang Kai-Shek) មានការផ្ទុះកំហឹងយ៉ាងខ្លាំង ប៉ុន្តែគ្មានដំណោះស្រាយអ្វីនោះទេ។ ក្រោយមកទៀត តៃវ៉ាន់ និង អាមេរិកក៏មានបញ្ហាជាមួយគ្នាផងដែរ ពោលគឺក្រោយពេលដែលប្រធានាធិបតីរបស់អាមេរិក គឺ លោក Richard Nixon នៅឆ្នាំ ១៩៧២ បានទៅបំពេញទស្សនកិច្ចនៅក្នុងប្រទេសចិន ហើយបានប្រកាសថា តៃវ៉ាន់គឺជាផ្នែកមួយនៃការគ្រប់គ្រង់របស់ចិនដីគោកទៅវិញ។
ជីវិតគ្រួសារ៖ បើនិយាយអំពីជីវិតអាពាហ៍ពិពាហ៍វិញ គាត់បានរៀបការចំនួន២លើក។ លើកទី១ គឺធ្វើឡើង ជាមួយនឹងនារីម្នាក់ឈ្មោះថា Mao Fumei ដែលជាអ្នកភូមិជាមួយគ្នា ហើយអាពាហ៍ពិពាហ៍នេះគឺធ្វើឡើងតាមរយៈការផ្សំផ្គុំរបស់គ្រួសារ។ ជីវិតរស់នៅជាមួយនឹងប្រពន្ធទីមួយនេះ គាត់មានកូនចំនួន២ នាក់ គឺស្រី ម្នាក់ និង ប្រុសម្នាក់។ ប៉ុន្តែក្រោយមក Mao Fumei ដែលត្រូវជាប្រពន្ធនោះក៏បានស្លាប់។
ចំណែកឯប្រពន្ធទី២របស់គាត់មានឈ្មោះថា Mayling Soong ដែលទទួលបានការអប់រំយ៉ាងជ្រៅជ្រះនៅសហរដ្ឋអាមេរិក។ អ្នកទាំងពីរបានស្គាល់គ្នានៅឆ្នាំ ១៩២០ ហើយបានរៀបការជាមួយគ្នានៅឆ្នាំ១៩២៧ ក្នុងទីក្រុងសៀងហៃ។ ប្រពន្ធទី២នេះ មានដើតួរយ៉ាងសំខាន់ផងដែរនៅលើឆាកនយោបាយជាមួយនឹង ឈៀង កាយជៀក (Chiang Kai-Shek) ។ ក្រោយ ពេលដែល លោក ឈៀង កាយជៀក (Chiang Kai-Shek) បានស្លាប់នៅឆ្នាំ ១៩៧៥ លោកស្រី Mayling Soong ក៏បានត្រឡប់ទៅរស់នៅសហរដ្ឋអាមេរិកវិញ ហើយបានស្លាប់នៅឆ្នាំ២០០៣៕
កែសម្រួលដោយៈMr365
